AMİDA HABER- Namzedê DEM Partî ye qezaya Bexlarî Siraç Çelikî aşkere kerd ke verê weçînayîşê 31ê Adare Beledîyeya Baxlarî seyan kesî girewtê gure.

Beledîyeya Qezaya Dîyarbekirî Baxlarî nê demanê peyênan de bi îdîayanê ruşwet û bêusulîye zanîyena û nika zî personelan gêna. Onca îdîa beno ke serekê Beledîye lajê xo û baldiza xo zî girewtê gure.

‘Ma do bi hûqûqî hesabê ci biperse’

Hemnamzedê DEM Partî yê Baxlarî Siraç Çelikî derheqê nê skandalî de qisey kerd û va “Hema vaje çend rojî mendê weçînayîşî rê la ma pêhesyayê ke beledîye zaf merdimî girewtê gure. No, demê weçînayîşî de çîyêdo rast nîyo.Ma do hetê hûqûqî ra ser o vinderê. Nika lazimtîya beledîye bi personelan çin a. Kenê ke bi nê merdiman ma û hemwelatîyan bîyarê têver. Goreyo ke ma pêhesîyayê ser a zêde merdimî girewtê. Xora medya de zî girewt Huseyîn Beyoglu baldiza xo Deniz Gürdeğir û lajê xo Mustafa Beyoğlu zî girewtê gure.”