AMİDA HABER- Platformê Hetkarîye û Pawitişê Bajarî yê Dîyarbekirî, derheqê safîkerdişê meseleyê Kurd de kombîyayîşê çapamenîye viraşt. Kombîyayîşê otêlêkê Dîyarbekirî de virazîya û tesîlkarê dezgeyanê sîvîlan yê Dîyarbekirî beşdarê ci bîyî.

Turan: 40 serrîyo ke pêrodayîş esto

Sereka Odaya Tabîban ya Dîyarbekirî Elif Turan kombîyayîş de yew qiseykerdiş kerd û va, “Herêma ma de problemî nêqedîyenê çi heyf ke. Ayra ma Platformê Hetkarîye û Pawitişê Bajarî yê Dîyarbekirî nayo ro. Ma kenê ke, meseleyanê nê bajarî rê çareyan bivînê. Ma zanê ke herêma ma de 40 serrîyo ke pêrodayîş esto. No, ma pêrûne ser o tesîrê xo keno. Ma do semedê çareserîya nê meseleyan ser o mîyanê xo de qisê bikê. Ma do badê cû netîceyê kombîyayîşê xo aşkere bikê.”

“Ma pêro nê dejan hîs kenê û tira zirar vînenê”

Badê zî Serekê Baroyê Dîyarbekirî Nahit Erenî qisey kerd û wîna va “ Serra 2012î de Prosesê Aşitî est kerdbi û mîyanê ma pêrûne de semedê çareserkerdişê Meseleyê Kurd hêvîyêke virazîyabî. La o proses nêresa peynî, xetimîya û qedîya. Gelo ma temsîlkarê dezgeyanê sîvîlan eşkenê nê meseleyan ser o qisê bikê? Goreyê mi her kes semedê nê meseleyan wazîfe bigîro. Meseleyê Kurd meseleyê esasî yê Tirkîya yo. Binê pêrûna meseleyan de safînêkerdişê meseleyê Kurd esto. Ganî ma îdarekaranê îktîdarî ra hîna zêde wazîfe bigîrê. No mesele tena meseleyê weçînayîşî û asayîşî nîyo. Ma pêro nê dejan hîs kenê û tira zirar vînenê. “

Nahit Erenî îzah kerd ke, semedê çareserkerdişê meseleyan şîdet çare nîyo û wîna dewam kerd. Ganî nê meseleyî êdî pê dîyalog zemînê demokrasî ser o bêrê safîkerdiş. Ma no sebeb ra ameyî têhet. Tabî tena pê ma nêbeno. Ma hêvî kenî hukmat goş dano vengdayîşê ma.”

Qiseykerdişan ra dima kombîyayîş çapemenîye rê padaye dewam kerd. Netîceyê kombîyayîşî do 26ê Şibate de aşkere bibo.