AMİDA HABER- Weçînayîşê 31ê Adare qedîya û netîceyê weçînayîşî do hîna zaf bêro qiseykerdiş. Semedê herême vîndîbîyayîşê qeyûman sey destpêkê demê neweyî yeno vînayîş û pawîyeno ke do hukmat nêeşko newe ra qeyûman tayîne beledîyeyê ke hetê şarî ra ameyê tayînkerdiş.

Karîkatorê Baran Tigra yo ke semedê Amida Haber karîkaturanê bi Zazakî xêz keno zî no hewte ca da qeyûman.

Heto bîn ra Dîyarbekir de netîceyê weçînayîşî zî bewlî bîyo.

Dîyarbekir de Namzedê DEM Partî Serra Bucak û Doğan Hatunî bi %64.07 qezenc kerd.

Namzetê AK Partî Halis Bildenî zî %16.85 rayî girewtî. AK Partî heta nika rayê en kemî nê weçînayîşî de girewt.

Namzedê Hüda-Parî Faruk Dinçî bi netîceyê %7.34 weçînayîş vindî kerd.

DEM Partî qezayê Bismil, Pîran, Erxanî, Hênê, Çinar, Karaz, Pasûr, Lîce, Silîvan, Peyas, Sûr, Baxlar û Yenîşehîrî zî qezenc kerdî.

Tena qezayanê Çêrmûge, Gêl û Hezro zî AK Partî serkewt. HÜDA-PAR zî nêeşka yew tek qeza qezenc biko.