AMİDA HABER- Nuştoxe û cigêrayoxe Nadîre Guntaş Aldatmaz vizêr Îstanbul de bi wesîleya Roja Ziwanê Dayîke ser o tehlukeyanê vera ziwanî ser o qisey kerd.

Semîner bînaya Kurd-Kavî yê Îstanbulî de ame dayîş.

Qiseykerdişî ra dima Dr. Nadîre kitabê xo îmza kerdî.

Nadîre Guntaş Aldarmaz tehlukeyanê vera ziwanî ser o qisey kerd û pare kerd ke ziwan û bawerîye di hetê muhîmîya nasnameyî yê û asîmîlasyonê nê wirdan ra yew zî asîmîlasyonê ê bînî xo de ano.

Nadîre Guntaş Aldatmaz panel de qalê rewşa zazakî ya Dêrsimî kerd û da zanayîş ke merkezê Dêrsimî de zazakî hetê doman û ciwanan ra êdî zaf tay şuxilîyena û îfade kerd ziwan seba nasnameyê merdiman zaf muhîm o û eke ziwanê neteweyêke vîndî bibo hinî nasnameyê ê netewe zî destî ra şono.

Nadîre Guntaş Aldatmaz aşkere kerd ke rewşa kirmanckî hol nîya la felatê ci zî mumkîn o û vat: ''Seba ke kirmanckî biciwîya ganî hetê qanûnan ra bipawîya. Seba mendebîyayîşê ziwanê ma perwerdeyê bi ziwanî şert o. Katalanya de zî ziwanê katalanan verê çinbîyayîşî de bi. La katalanan seba ziwanê xo, xo ver da û dewleta Îspanya bêeçare mende ke perwerdeyê bi ziwanê katalanan bido. '