AMİDA HABER- Semedo ke vayîya goştî zêdîyaya û tim û tim zem yeno fîyatê goştî ser şar bi saetan şino verê Dezgeyê Şitî û Goştî yê Dîyarbekirî û bi saetan dore vindeno ke goşto tay ercan bigîro.

‘Peynîya hewteyî de serebirnayîş çin o’

Yew hemwelatîyêk vano; “ Ez serê sibayî ra nata semedo ke xo rê goşt bierînî dore de ya. Semedo ke peynîya hewteyî de serebirnayîş çin o saete 10.30 de dest bi roştişî kenê. Numreya min 352 a. Nika bi qasê 400 kesî dore de yê.”

Qesaban de goş zaf bîyo vay

Yewna hemwelatî zî dano zanayîş ke qesaban de goşt zaf bîyo vay û wîna va “Mîyanê aşmêke de se ra 30 zem ameyo goştê bizan ser. Goşto ke verê cû 400 TL bi nika 500 TL yo. Pê maaşê teqawûtîye ez nêeşkena debara xo bikî. Ez zî semedo ke xo rê tay ercan goşt bierînî dora xo pawena. Xora tîya de tim dore esta. Mabênê fîyatanê Dezgeyê Goştî û Sitî û qesaban de nême ra nême ferq esto.

Rojane hezar kesî goşt gênê

Îdarekarê Dezgeyê Goştî û Sitî yê Dîyarbekirî danê zanayîş ke, Dîyarbekir de tena hebêke cayê rotişî esto, rojane 2 ton qîyma, 2 ton zî goşto bê este û pêroyî de 4 ton goşt roşîyeno û rojane hezar kesî maxazaya înan ra goşt erînenê .

Heto bîn ra Serekê Odaya Qesaban yê Dîyarbekirî Hacı Atlı zî hîşyarî dano, wazeno wa tedbîrî bêrê girewtiş û wîna vano ”Her serre verê Aşma Remezanî fîyatê goştî beno vay. La ma sey nikayî yew zêdîyayîş nêdîyo heta nika. Semedo ke welat de karê citkarîye nêbeno û heywanî nênê weykerdiş vayîya goştî zêdîyena. Xora fîyatê yem û neqlîye zî zêde yo. Eke tedbîrî nêrê girewtiş do fîyatê goştî hîna zêde bizêdîyo” (Amida Haber Taybet)