AMİDA HABER- Serekîya Dayîreyê Xizmetanê Sosyalan yê Beledîyeya Dîyarbekirî emser 2 cayanê Dîyarbekirî de çadira fitarî na ro. La par hûmara çadiran hîrê bî. Çadirî do demê aşma Remezanî de akerde bê û rojanê werd bidîyo şeş hezar kesan.

‘Saete û nîme pay ra mendê’

Kesê ke desttengê zî semedo ke fitarê xo akerê şinê ê çadiran û bi saetan pay ra manenê ke fitarê xo ekerê. Dîyarbekir da demê fitarî saete 18.30 o la kesê ke şinê çadire saete 16.30 de kewnê dore ke wa xo biresnê werdê fitarî.

Şaro ke dore de biasetan pawena Amida Haberî rê qisey kerd Mehmet Aslan o 67 serrî wîna va, “Ma keye de panc kes ê. Ez bi heqê askarî şuxulîyena. Miva, qet nêbo ma yewêk tîya de werdo belaş biwere. Her roj ma ra yew yeno tîya de fitarê xo akeno. Ez nêzana êyê ke ma îdare kenê na fotografe ra şermîyenê yan ney.”

Ayşe Demire zî vana “Mêrdeyê ma astengdar o û kes çino ma rê pere bîyro keye. Maeşê mêrdeyê mi ma rê bes nêkeno. Ayra ma ameyê tîya de fitarê xo akenê. Hîrê gedeyê mi estê. Ez tîya ra nanê xo gêna bena keye û gedeyanê xo kena mird. La ez her roj 2-3 saete tîya de dora xo pawena. (Zelal Sinayiç)