AMiDA HABER- DEDAŞ ke her tim Dîyarbekir de pê skandalan yeno rojdem na rey dest ci kerdo ke karkeran kar ra erzeno. Goreyê zanayîşan, DEDAŞî bi bahaneyê kêmîya performansî xeylê beşan de karkerî gure ra vetî. Ame zanayîş ke, tay personelê ke ameyê vetiş, wayîrê tecrubeyê 8-9 serran ê.
Êyê ke referansê înan o sîyasî esto yene pawitiş
Yew personelo ke kar ra ameyo eştiş û nêwaşt nameyê xo bido vano ke, “Ez qasê 9 serrîyo ke mîyanê DEDAŞ de xebitîyena. Performansê mi ame bahanekerdiş û ez ameya vetiş. Ma verî senî xebitîyêne nika zî wîna xebitîyayêne. Xebatkarî vera na bêedeletî û bêhûqûqî vengê xo nêvejenê. Êyê ke bi serrano ke xebitîyêne û referansê înan o sîyasî çin o heqê xo kêm gênê la êyê ke referansê înan o sîyasî esto zêde ra heq gênê. Cayê nê çîy kamcîn kitab de esto. Îdarekarê ke cayo berz de wezîfe kenê nişenê wesayîtanê milyoninan, bananê mîlyoniyan nişenê ro. La êyê ke bi heqê askarî xebityenê înan pê keda înan terbîye kenê”
Kar ra vetiş normal o!
Îdarekarê DEDAŞî ke ma înan de pêvînayîş kerd zî vanê, “Rey-rey bedilnayîşê (vurnayîşê) wînayênê benê û no proses, prosesêko normal o” (Merkezê Xeberan)