AMİDA HABER- Serekkomar Recep Tayyip Erdogan hem semedo ke beşdarê Festîvalê Rarîyê Kulturî yê Sûrî bibo û beşdarê tay akerdişê awanîyan bibo peynîya nê hewteyî de yeno Dîyarbekir. Semedo ke Erdogano ke serrêk ra badê pey yeno Dîyarbekir, xebatêka pîle esta. Amida Xeber ameyîşê Erdoğanî Camîaya Karî rê pers kerd.
Camîaya Karî çi pawena?
Serekê Odaya Sanaya û Tîcaretî Mehmet Kayayî derheqê ameyîşê Erdoganî de qisê kerd û îzah kerd ke, înan derheqê tesîsê binawanîya awguznayîşî yê OSByî yê tekstîlî de netîceyêk girewto.
Wa erdogan probleman muxataban ra goşdarî biko
Kayayîş da zanayîş ke, Dîyarbekir de problemê binawanîya Sanayî û fînansalî dewam kenê û wina va: “Ganî nê meseleyî Brêz Erdoganî rê bêrê vatiş. Ma serra 2019î ra verî eşkêne nê çîyan Erdoganî ra vajê, la 2019î ra pey nê problemi hîna zêde sîyasîyan ser o ameyê neqilkerdiş. Ma mîyanê nê halî de kenî-nêkenî nêeşkenî pêvînayîşan bikerê. Her çî ra ver ganî Erdogan Camîaya Karî reyde qisê biko û goş bido waştişanê înan ser.”
Nêverdenê ma pêvînayîş bike
Kayayî îfade kerd ke, xeylê wexto ke Erdogan karsazan reyde nêno têhet û wina dewam kerd “Ewro nêverdenê ma Erdoganî reyde qisê bike û bêrê têkişte. Na mesela de tesîrê muhameleyê Walîyan zî esto. La zanîyeno ke zaf problemê nê şaristanî estê ke gere înan rê çare bêro vînayîş. Eke pêvînayîş çinê bo meseleyan rê çare vînayîş zehmet o. Aye ra sere de meseleyê problemê binawanîya Sanayî û fînansalî, zaf meseleyi estê ke ma qayîlê înan ser o pêvînayîş bike. Ez hêvî kena semedê nê waştişê ma astengî nêvejîyê.”
Kayayî derheqê meseleya Kurd de zî qisê kerd û va “Semedê çareserkerdişê meseleya Kurd ma yew suprîz nêpawenê. Wexto ke Erdogan verê cû amêne Dezgeyanê Sîvîlan reyde amêne yew ca û badê pey beyanatê muhîmî dayêne. La nê serranê peyênan de polîtîkaya ke meseleyanê herême rê çare nîya esta. Astengîya pîle na ya ke polîtîkayê asayîşî esas yenê girewtiş û na zî safîkerdişê meseleyan asteng kena. Ez hêvî nêkena ke Erdogan do derheqê çareserkerdişê meseleya Kurd de çîyêk vajo”.
Ganî destegî bêrê revize kerdiş
Serekê Borsaya Tîcaretî yê Dîyarbekirî Engin Yeşil zî vano, Ma qîmet danê ameyîşê Serekkomar Erdoganî.
Yeşîlî zî eleqe ant sektorê zîret û heywankarî de çareserîya kêmîkerdişê maîlîyetan û wina va, “Zirarê nê wazîyetê negatîfî citkaran rê esto. Destegê ke dîyenê sektorê zîret û heywankarî gere hîna bêrê zêdekerdiş. A bîne zî gere projeya awdayîşî ya Silîvanî zî leze bêra qedînayîş.
'Ma semedê deynanê SGK û Bağ-Kurî newe ra plansazî wazenê'
Serekê Yewîya Odayanê Esnaf û Zanatkaran (DESOB) Alican Ebedinoğlu zî, pakêta ke semedê esnafan vizêr hetê Serekkomar Erdoganî ra ameybî aşkere kerdiş muhîm vîneno û wina vano, “Ma wazenê wa kredî bibê 7.5, kredîyê xebitnayîşî zî bibê zêde. Heto bîn ra ma wazenê wa deynê esnafan newe ra bêrê plansazî kerdiş. Pakêta ke ameya aşkere kerdiş problemanê ma çareser nêkena. Nêyî bes nîyê. Ma cîyayîya pozîtîfe wazenê. Xeylê esnafê ma estê ke nêeşkenê Bağ-Kurê xo bidê. Ma semedê deynanê SGK û Bağ-Kurî newe ra plansazî wazenê. “
Fidan: Wazîrî problem ê
Serekê herêma Sanayî û Organîze Mustafa Fidan zî vano, wezîrî probelmê cîdî yê.
Fidan wina qisê kerd, “Sanayîkarê ma êyê ke berarenê û ked danê problemê înan bi bankayan esto. Problemê sanayîkaranê ma yo tewr pîl, nêeşkenê xo biresnê finansî. Heto bîn ra lîmîtê kredîyan zaf kêmî yo. Ma wazenê wa nê lîmîtî bêrê zêdekeridş.. (Xaber: Îlyas Akengin-Taybet)