AMİDA HABER - Roja 28.01.2023î de Dîyarbekir de Qonaxê Zerzevanî de kokteylê daşinasnayîşî yê kitabê “KESA” o ke hetê Mutlu Canî ra ameyo nuştiş dîya û roja îmza vîrazîya.
Xeylê heskerdoxê zazakî bi na wesîle ra ameyî têlewe û roja îmza û daşinasnayîşî rê eleqeyêko pîl estbi. Deyîrbaz Mehmet Atlıyî zî peynî de çend deyrê bi zazakî vatî.
Nuştoxê Nuştox Mutlu Canî yew qiseykerdiş kerd û va ke; “ Ez bi serrano ke înternet ser ra dersa Zazakî ya bi online dana. Ez ewnîya ke xeylê meteryalî mi dest de top bîyê û ez bi a xebate bîya wayîrê tecrubeyêk. Mi waşt ez xebata xo bika nuştekî ke wa şarê ma cira feyde vîno. Mi bi nameyê "Bi KESA Roje bi Roje Kirmanckî (Zazakî)” û bi şîarê “KESA şima rê bes o” na xebata xo temam kerd.”
Badê pey hunermend Mehmet Atlıyî zî mêmanan rê çend deyrî vatî. Mehmet Atliyî xebata Mutlu Canî pîroz kerd û ey rê serkewtiş waşt. Mehmet Atliyî zî yew qiseykerdiş kerd û vabke; “Nê xebatî semedê ziwanê ma zaf ercayê yê. Lazim o ma wayîrê nê xebetan vejîme. La ma zanê ke ziwanê ma tenya pê nê xebatan nêxelisîyeno. Her çî ra ver lazim o sere ra hetanî peynî gedeyê ma perwerdeyê bi ziwanê xo yê maye bigîrê. Nika gedeyê ma nêeşkenê ziwanê xo qisê bikê. Tirkî dormeleyê gedeyanê dorpêç kerda. Heta ke ziwanê ma nêbo ziwanê perwerdeyî nêxelisîyeno û ez tersena ke do rojêk bimiro.”
Kitabê “KESA”
Kitabê Mutlu Canî yo bi nameyê KESA ke o 2 serrî ser o xebitîyayo, Kanûna 2022î de amebi weşanayîş. Nuştox Mutlu Can o ke bi seran înternetî ser o bi online dersê Zazakî dayo, dima ra a xebata xo bi nameyê “KESA” kerda kitabêkê musyayîşî. Mutlu Can qasê 2 serî na xebata xo ser o mijul bîyo û semedo ke wa feydeyê ci Zazakî-Kirmanckî rê bibo sey kitab çap kerdo.
Bingeyê KESA, berardişanê rîpelê musnayîşê kirmanckî (zazakî) ke weşanê ey hetê Mutlu CANî ra û 17 Nîsane 2020î ra nat Facebook û Instagramî ser ro yeno ramitene ra teşkîl beno. Kitabo ke 2 cîldan ra pê yeno û 512 rîpelî yo, ancîna bi îmzaya CANî weşanîyayo. (Amida Haber)