AMİDA HABER- Partîya Çep a Keske semedo ke demê vijnayîşê namzetan de goş nêkuyawa waştişanê raydayoxanê xo û palîtîkaya xo ya Kurd ra dûrî kewta raştê reaksîyonan yena. Seke zanîyeno Dîyarbekir sey kelaya HDPyî yeno zanayîş la Partîya Çep a Keske Dîyarbekir de 8 parlementerî vetî,. HDP îdîa kerdêne ke Dîyarbekir de do 12 heb parlementeran vejo.
Weçînayîşê Serekkomarî yê Tirkîya ke 14ê gulane de ame kerdiş dora yewine de nêqedîya û mend dora diyîne. Îtîfaqê Cumhurî hîna zaf rayî girewtî û avantajê xo esto. Meclîs de zî Îtîfaqê Cumhurî hîna zaf parlementerî qezenc kerdî. Partîya Çep a Keske (Yeşil Sol Parti) weçînayîşê parlementerî de bi nameyê Blogê Ked û Demokrasî kewt weçînayîş la birînêka pîle girewte. Pêroyê Tirkîya de rayê Partîya Çep a Keske bîyê kêmî. Partîya Çep a Keske ke verê cû bi nameyê HDP kewtbî weçînayîş, serra 2018î de se ra 11,7 rayî girewtbî. La no weçînayîş de eşkaya se ra 8,8 rayan bigîro.
HDP “Kelaya xo” de zeîf bîya
HDP weçînayîşê peyênî de Dîyarbekir de se ra 65,54 rayî girewtibî. Nê weçînayîşê peyênî de eşkaya se ra 61,19 rayan bigîra. HDP weçînayîşê verênî de Dîyarbekir de 9 paramenterî erşawitibî meclise la nê weçînayîşê peyênî de eşkaya 8 parlamenter vejo. AK Partî zî Dîyarbekir de 3, CHP 1 parlamenter veta.
‘Dîyarbekir de tena yew ten o naskerde estbi o zî nêame weçînayîş’
Unîversîteya Dîcle ra Prof. Dr. Rüstem Erkanî derheqê rayanê Partîya Çep a Keske de Amîda Haberî rê qisey kerd.
Prof. Dr. Rüstem Erkan vano ke, “Partîya Çep a Keske weçînayîş de serkewtişo ke ci ra amêne pawitiş qezenc nêkerdo. Mi vatêne “rojawanê Tirkîya de qewetê HDP esto” la semedo ke Partîya Çep a Keske namzetê raştî nêmojnayê Rojawanê Tirkîya de zaf rayî vîndî kerdî. Dîyarbekir de tena Mehmet Emin Aktar amêne naskerdiş o zî nêame weçînayîş. Herême de şar namzetanê Partîya Çep a Keske rê razî nêbi. TÎP reyde hemkarî zî feydeyêk nêda ci. Zirarê ci estbi. Hem YSP hem zî CHP partîyê ke înan reyde îtîfaq kerdê înan ra feyde nêdîyê. Rayê ke armanc kerdêne nêresyê ê rayan.”