AMİDA HABER - Erîvane Bulut a 21 serrî ke Şampîyonaya Boksî ya Dinya de bibî şampîyon qanalê TRT Kurdî de bibî mêmana programê Stêrkên Sporê. Program de wexto ke qisê kerdêne zehmetî antbî û xeylê çekûyê tirkî xebitnaybî. Erîvane Barut hesabê xo yê Twitterî ser ra derheqê na mesela de beyanatêk da.
‘Zaf ciwanê ma estê ke ziwanê xo ra dûrî kewtê’
Erîvane da zanayîş ke Medyaya Sosyale ser o rastê lincî ameya û wîna vana: “Ma bi xeyr dî. Seke zanîyeno ez TRT Kurdî de bibîya mêmane û mi ra amebi waştiş ke ez Zazakî (Kırmancki) qisê bika. Mi ziwanê xo yê dayîke zaf weş nêzanêne. Mi kerd ke ez xo îfade bika. Badê mi dî ke ez Medyaya Sosyale ser o rastê tay xeberan ameya. Ez rîca kena gedeyanê Dêrdimî ziwanê înan ra mehrûm meverdêne. Tarîxê pêrûna ziwanan esto û nesil bi nesil neqlê ma bîyê. Ma ganî nêverdime wa no ziwan vindî bibo. No zî trajedîyêka şarî yo. Ez do nika ra tepîya cahd bikî ke ziwanê xo hîna weş bimusa. Ez neslê koyîyan ra tenya yewêk a. Zaf ciwanê ma estê ke sey min ê. Beno ke mi ra xirabêr ziwanê xo qisê kenê. Zaf ciwanê ma estê ke ziwanê xo ra dûrî kewtê.”
Barut, hesabê TRT Kurdî yê twitterî zî agahdar kerd û va “Ez sporvanêka Dêrsimij a. Erîvane pêroyê Dêrsimî temsîl kena. Mi yew hetê ma yê komelkî oyo ke nika mireno ard verê çimanê her kesî. Mi yew hetê ma yo ke mireno nişan da. Wa na zî biba wesîla ke wa her kes ser o bifikrîyo. Rastîya xo bizano”.