AMİDA HABER- Weçînayîşê Mehelî yê 31ê Adare ser ra hewteyêk vîyart. Zaf cayanê Tirkîya de serekê beledîyeyan ê neweyî mazbatayê xo girewtê û dest bi wazîfeyê xo kerdê. Labelê Dîyarbekir de AK Partî her çiqas vîndî kerd zî seba Beledîyeya Bajarê Girdî û 13 qezayan muracat kerd ke wa weçînayîş bêro betalkerdiş.

Rîyê nê muracatî ra Hemşaredarê DEM Partî nêeşkay mazbatayanê xo bigîrê û dest bi wazîfeyê xo bikerê.

Îtîrazê Ak Partî ame redkerdiş

Teşkîlatê AK Parti Dîyarbekir de 13 qezayan û merkez de muracat kerd ke wa weçînayîşî bêrê betalkerdiş. Labeleê YSKyî muracatê înan red kerd. Ak Partî waşt wa mazbatayê hemşaredaran nêrê dayîş.

Mazbatayî do siba bêrê dayîş

Heyetê Weçînayîşî yê bajar û qezayan îtîrazê Ak Partî red kerd û qerar da ke siba mazbatayê pêroyê hemşaredaranê DEM Partî bêrê dayîş. DEMPartî zî aşkere kerd ke, ê do siba mazbatayanê xo bigîrê û dest bi karê xo bikerê.

Weçînayîşê 31ê Adare de DEM Partî bi se ra %64 (463 hezar rayî) AK Parti zî bi se ra %16 (121 hezar) rayî girewtbî.