AMİDA HABER- Bi ameyîşê hamnanî Dîyarbekir de fîyatê qeşaşitî zî bîyo vay. Partopa qeşaşitî 10-20 TL ra amêne rotiş labelê emser 30-40 TL ra topa ey yeno rotiş.

Êyê ke qeşaşit roşenê zê razî nîyê

Qeşaşitê ke bi çîlege, wişna û çîkolata yenê viraştiş hîna zaf yenê rotiş û vayîya înan hîna zêde ya. Emir Oğuz o ke Mîyanê Sûrî de qeşaşit roşeno îzah keno ke, emser qeşaşit zaf bîya vay û wîna va “Emser fîyatê qeşaşit zaf bîyo vay. Şar êdî nêeşkeno bigîro. Şar zaf pê gere keno. Ma topa ci 30 TL ra roşenê. Ayê ke destteng ê topêk ra kêmî xo rê nêm tope gênê. Ma zî nê wazîyetî ra razî nîyê. Labelê semedo ke fîyatê her çî bîyo vay, ma bi mecburî nê fîyatî ra roşenê.”

‘Eke wînî bo ma do mêwerê.’

Ayşe Kaya ke semedo ke gedeyê xo rê qeşaşit bîgîra ameya verê qeşaşitroşî vana “Fiyat zaf vay o. Topêka qeşaşit bîya 30 TL. La wînî beno? Ez pê mat menda. Eke wînî bo ma do qeşaşit mewerê.” (Zelal Sinayiç)