Awisturya, qirkerdişê Helebce sey ‘Jenosîdê Kurd’ qebûl kerd

AMİDA HABER - Xebata wekîla Parlamantoyê Vîyana yê Awisturya Berîvan Aslan ser o, Parlamentoyê Vîyana qirkerdişê Helebce sey “Jenosîdo ke vera Kurdan ameyo kerdiş” qebul kerd.

Berîvan Aslan na xebere hesabê xo yê Tiwitterî ser ra pare kerd û wîna va “Tarîxê sîyasî yê Awisturya de reya verêne yew sûco ke vera Kurdan bîyo, badê xebata min sey ‘jenosîd’ ame naskerdiş. Vizêr qetlîamê Helebce Parlamentoyê Vîyana de hetê pêrûna partîyan ra bi yew vengîye sey ‘jenosîd’ ame qebûlkerdiş.”

Helebçe de çi qewimîyabi?

6ê Adara 1988î de pê fermanê Seddam Husênî bombeyê kîmyewî erzîyaybî mintiqaya Herêma federal a Kurdistanî Helebce ser. Qetlîam de 5 hezar kesî merdî, 10 hezar kesî zî birîndar bîyî.