Bînaya xisarine qeldîya ya sexleme ser. Keyeyî mexdûr ê

AMİDA HABER - Zelzeleyê 6ê Sibate de qezaya Dîyarbekirî Bexlar, Cadeyê Hatboyu ser de Apartmana Fîdan xisaro giran girewt. Ekîban çar rojî verî dest bi rijnayîşê bîna kerd. La demê rijnayîşê bîna de tedbîrî nêameyî girewtiş û Apartmana bi nameyê Îpek Sevim a ke kişta bînaya xisarine de bî zî bîy xisarine.

Şêlikê bînaya Îpek Sevim nika nêzano se biko. Semedo ke kolonê bînaya înan şikîyayê nêeşkenê şorê keyeyanê xo. Îdarekarî ke bi veynayîşê şêlikê bîna ameyî uca zî çîke nêkerd û da piro şîy.

‘Cayo ke ma şêrê ci çin o’’

Mexdûran ra Mehmet Varsakî Amida Haberî rê qisey kerd û va, “Kes ma muxatab nêgîno. Bînaya ma bêxisar bî. La nika semedo ke bîna ke kişta ma de şîya ra bîya xisarine. Ma nika terse ver nêeşkenê şorê zere. Tef talê ma pêro zere de yo.” Heto bîn ra ma îdarekaran dir derheqê mesela de bi telefon qisey kerd, înan ma ra va: “Wexto ke bînaya xisarine şîya we bînaya bîne xisar girewt. Nika bîna ser o cigêrayîşê teknîkî devam kenê. Muhendîsê ma ser o xebitîyenê. Ma do ca bide keyeyanê mexdûran. Nika uca de polîsî 7/24 nobete gênê.”

(Xebere: Zelal Sinayiç)