Cayê honikbîyayîşê gedeyan; Plajê Anzeleyî!

AMİDA HABER- Germê Dîyarbekirî yo zêde qij ra pîl tesîrê xo her kesî ser o keno. Qijê Dîyarbekirî zî vera nê germê Afrîqayî xo erzenê mîyanê awa Anzeleyî û uca de xo honik kenê.

Midûrîya Meteorolojî ya Herême, vera germe zêdeyî hewna hayîdarî da. Midûrî aşkere kerd ke Dîyarbekir de germîya hewayî do 2-3 derece biba zêde û waşt wa, eke mecbûrî nêbo wa kes mabênê saetanê 11.00 û 16.00 de nêvejîyo teber.

Plajê Anzeleyî yê Dîyarbekirî

Qijê Dîyarbekirî ke binê tesîrê germî de mendê, Hewza Anzeleyî ke Mîyanê Sûrî de ca gênê de asnaw kenê û honik benê. Keyeyê ke gedeyanê xo anê Anzele, gedeyanê xo erzenê awe û înan temaşe kenê.

Tarîxê Anzeleyê Dîyarbekirî

Cayê Anzeleyî demê Osmanîyan de û demê destpêkê Komare de (1680-1960) cayê çermkaran bi. Awa Anzeleyî çimeyê xo ra vejîyayêne, demêk bînê erdî ra gêrayênê, resayêne Berê Mêrdînî (awa herame) û badê zî resayêne arê û en peynî rişîyayêne Çemê Dîcle.