Heqê kîraya banan zêdîya, wayîrê banan wazenê kîracîyan vejê!

AMİDA HABER -Goreyê doneyanê TÜİKî Tirkîya de enflasyon resayo se ra 90. La goreyê cigêrayîşanê xoseran, doneyê TÜİKî raşt nîyê, enflasyon resayo se ra 300.
Dîyarbekir de zî sey pêroyê Tirkîya heqê kîraya banan, gorê zêdebîyayîşê enflasyonî ra zaf zêdîyayo. Semtê Diclekentî yê Dîyarbekirî de kîraya banan hetanî 6 hezar lîra zêdîyaya.
Gorê zêdebîyayîşê kîraya bana, wayîrê banan zî kenê ke kîracîyanê xo yê verênan keye ra vejê. Wexto ke wayîrê banan nêeşkenê kîracîyanê xo vejê, na rey şinê mehkemayan ke înan vejê. Dîyarbekir de zî hûmara dewayê ke Dadgeha Hûqûqî ya Pêkerdişî de yenê vînayîş resaya 2 hezar û 300. Dewayan de gorê serra verêne 3 qat zêdîyayîş esto.
Dewayî 1-2 serrî dewam kenê
Avuqat Ahmet Olamî Amida Xebere rê qisê kerd û da zanayîş ke, semedo ke dewayî bîyê zaf, heta 1-2 serrî dewam kenê û wîna va: “ Dewaya ke na aşme yena akerdiş, semedê ci aşma Adare de roj dîyeno ci. Dewaya ke aşma Adare de yena vînayîş zî semedo ke dewaya qerarî nîya bena derg û 1-2 serrî dewam kena. Heta ke dewa netîce bibo zî kîracîyê banî zî keye de nuşeno ro”
‘Heqê kîra rê se ra se zem yeno waştiş’
Olamî îzah kerd ke, wayîrê banan heqê kîraya banî rê se ra se zem wazenê û wîna dewam kerd. “Kîracîyî zî wazenê wa meaşê înan se ra se zêde bibo. Hukmat qanûn veto û vano gereke se ra 25 ra zafêr zem nêbo. La kes goş nêdano nê qanûnî ser”
Ganî kîracîyî heqê xo bizanê
Avuqat Olamî waşt wa kîracîyî zî heqanê xo yê qanûnîyan bizanê û wîna va “Eke wayîrê keyeyî wazeno şima keye ra vejo, gereke sebebê ey raşteqîn bo. Şima senî ke kontrat viraşt gorê ey şêne.”
(Xebera Taybete: Gönül Morkoç)