Karkerê DEDAŞî ke gure ra ameyê vetiş heqanê xo wazenê

AMİDA HABER- Çend rojî verî karkeranê DEDAŞî sere de Dîyarbekir 6 şaristananê bînan ê dorûverî de verê awanîyanê DEDAŞî de ameybî têhet û DEDAŞî protesto kerdbî.

Xeylê karkerê DEDAŞî ke mîyanê grevan de ca girewtbî gure ra ameybî vetiş. Karkeran waştibî wa maaşê înan û şertê xebityayîşê înan bêrê rastkerdiş.

Na hewe 100 ra zêde karkerê ke gure ra ameyê vetiş Dîyarbekir de ameyê verê awanîya DEDAŞî û DEDAŞ protesto kenê. Karkerî hem heqanê xo yê sendîkal hem zî karê xo peyser wazenê.

Heto bîn ra çend sendîkayî zî desteg danê mucadeleyê karkeranê DEDAŞî. Ewro Sendîkaya Kedkaranê Weşîyê û Sendîkayê girêdayîşê DİSKî ameyî verê awanîya DEDAŞî û karkerî zîyaret kerdî. Sendîkayî zî wazenê wa heqê karkeran bêrê dayîş û karkerî peyser gureyê xo rê bêrê girewtiş.