Rîyê dizdan ra şarê taxa 5 Nîsane rê rehetîye çîn ya!

AMİDA HABER -Dîyarbekir de Zelzeleyê 6ê Sibate de 417 kesî wefat kerdbî. Qezaya Dîyarbekirî Bexlarî de 4 bînayî rijîyaybî. Tena Taxa 5 Nîsane ya Bexlarî ke tede 30 hezar kesî cuyenê de 32ê ci zaf xisarinî, 68ê ci orte xisarinî pêroyî de 99 bînayî ameyê vengkerdiş. 12 bînayî ameyê rijnayîş û 87 bînayî gere bêrê rijnayîş.

Mabênê erdlerzî ra serrêk vîyarto la hema 87 bînayî nêameyê rijnayîş Dizdî zî musalatê ê bînayan bîyê û dekewenê bînayan û ber, pencera,borî, qeblo, parke û malzemeyanê mitbaxî diznenê.

Muxdarê taxe Mehmet Karahan vano ke, “ Ma mîyanê terse de cuyenê. Ma semedê ney çend rey Qaymeqamê Bexlarî rê muracat kerd. Dizdî şewe yenê malzemeyanê binayan cayê înan ra vejenê benê. Ma bi teq-reqa înan nêeşkenê bikû ra. Bînayê ke kêm xisarinî bîyê rîyê înan ra bîyê zaf xisarinî. Asayîşê canê şêlikê taxe çîn yo. Wexto ke ma veynenê polîsan ê zî semedo ke bîna xisarin a nêeşkenê bikewê mîyanê bîna.”

(Xebere: Zelal Sinayiç)