Diyarbekirijan cewabê Erdoganî da: Zazayî zî xora Kurd ê

Diyarbekirijan cewabê Erdoganî da: Zazayî zî xora Kurd ê

Serekkomar Erdoganî zîyaretê xo yê Dîyarbekirî de semedê Selahattin Demirtaşî vatibi “Xora o Kurd nîyo”. Nê vatişê Erdoganî Dîyarbekir de raştê nêrazîbîyayîşan ame.

AMİDA HABER- Êyê ke nêzdîyê AK Partî yê vanê “Vatişê Erdoganî xelet ameyê famkerdiş” la temsîlkarê STKyan ê Dîyarbekirî wîna nêfikrîyêne.

‘AK Partî xo şaş kerd’

Derheqê nê vatişanê Erdoganî de Avuqat Sidki Zîlanî Amida Xebere rê qisê kerd, va, “Semedo ke AK Partî fam kerda ke HDP do weçînayîş de desteg bido CHP xo şaş kerda. Ê bi xo zî zanê ke, her çiqas Selahattin Demîrtaş zere de bo zî aktorêko tesîrin o. Beno ke desteg bido Kılıçdaroğlu. Aye ra AK Partî hende şina ey ser o.”

‘Zazayî Kurd ê’

Zîlanî îzah kerd ke minaqeşeyo ke nasnameyê Demirtaşî ser o benê raşt nîyê û wîna dewam kerd: “Eke vanê ‘Zazayî Kurd nîyê’ wa bizanê ke Zazayî Kurd ê. La eke semedê Demîrtaşî qestê înan Armenîbîyayîş yo, no sûcê nefretî yo. Zemanêk vatêne ‘Kurdî çîn yê’ nika vanê ‘Zazayî Kurd nîyê ' Verî ra nata Zazayan xo Kurd hesibnayo. Erdogan tarîxnas nîyo. Semedê ey zî vajîyeno ke Gurcî û Laz o.”

Parlak: Xelet ame famkerdiş

Endamê AK Partî yê MKYKyî Alaaddin Parlak zî îfade keno ke, vatişê “Selahattin Demirtaş Kurd nîyo” hetê tayinan ra maxsus dîyeno ver û wîna vano, “Qisêkerdişê Brêz Erdoganî muhîm bi. Ma nasnameyê merdiman dir eleqedar nêbenê. Uca de qestê Serekkomarî Kurdîtî nîya. Vatişê ey xelet ameyê famkerdiş. Ma nijatperestîye nêkenê. Xora Zazayî zî Kurmancî zî Soranî zî pêro perçeyêkê Kurdî yê.”

‘AK Partî sîyasetê herême ra dûrî kewta’

Serekê Odaya Bazieganî û Sanayî yê Dîyarbekirî Mehmet Kaya zî vatişê Erdoganî yê derheqê Demîrtaşî de vano: “ Nê vatişan ra zî fam beno ke AK Partî sîyasetê herême ra dûrî kewta. Verê cû AK Partî mîtînganê Dîyarbekirî de qalê sîyasetê xo kerdêne. La nika tenya bi pirodayîşê HDP sîyaset kena. Fam beno ke çîyo ke pê sîyaset bikê nêmendo. Feydeyê ney AK Partî rê çîn yo. AK Partî wexto ke bîy îqtîdar destegê Kurdan girewt. Onca mecbura ke semedê dewamîya îqtîdarê xo destegê Kurdan bigîro”

(Xebere: Gönül Morkoç)

Etiketler :
HABERE YORUM KAT
UYARI: Küfür, hakaret, rencide edici cümleler veya imalar, inançlara saldırı içeren, imla kuralları ile yazılmamış,
Türkçe karakter kullanılmayan ve büyük harflerle yazılmış yorumlar onaylanmamaktadır.