Hûmara 18. ya Kovara ŞEWÇILA vejîya

AMİDA HABER - Hûmara 18. ya kovara Şewçila bi muhtewayêka dewlemende vejîya. Kovare na hûmara xo de bi muhtewayêka dekerdeyî vejîyena verê wendoxanê xwu.

Edîtoranê Kovara Şewçila ra Mehmet Şah Aslanî derheqê prosesê vetişê kovare de malumatî dayî Amida Haber.

Mehmet Şah Aslanî derheqê muhtewaya hûmara peyêne de zanayîşî dayî û da zanayîş ke Kovara Çewçila xizmetê Kirdî kena û wîna behsê prosesê vetişê Kovara Şewçila kerd: “ Kovara Çewçila serra 2011 ra hetanî 2018 weşane xwu kerdbi. Dima weşanê xwu vinderna. Emser mi waşt ke bi yew heyecano newe ma newe ra dest pê bikerê. Sere de Roşan Lezgîn, Alî Fuad Azad û sewbîna tayê merdimanê erjîyayan reyde ma qerar girewt û weşanê xwu kerd. Kovara Şewçila hîrê aşmî ra reyke vejîyena. Ena hûmara de mi " Cewze de dersa Zazakî" Roşan Lezgînî " Tercumeyê Yew Qesîdeya Cizîrî", Bîlal Zîlanî "Biyografîya Ahmed el- Kurdî", Deyndar Nuştox " Rojnuşteyê Mi" nuşto. Şiîr de Meqsed Muqrîyanî " Qesawet û Şayî" , Ehmedê Xagî zî " Bapîr Seyfullah" nuşto. Serwet Akkaş " Hîkayeya Xidî" û Îsmet Borî " Têvernayişê Dejan" warê hîkaye de nuşto. Yew beyte Mela Mehmedê Nêribî " Mi To ra Nêva" esta. Reyna Roşan Lezgînî Sadiq Hîdayetî ra " Katya" û Roland Barthesî ra zî " Nuştoxî û Nuştekarî" tadayê ziwanê ma Kirdî (Zazakî) ser."

Hûmara 18. ya kovara ŞEWÇILA Diyarbekir de: PirtûkaKurdî û Payîz Pirtûk de Îstanbul de: Medya Kitabevi de yena peydakerdiş.