Roşnvîro Kurd Munzur Çemî dinyaya xo vurîna

AMİDA HABER -Nuştox û Cigêrayox, kedkarê ziwanê Kurdkî, roşnvîr û ronayoxanê Grûba Xebate ya Vateyî ra Munzur Çem xeylê wext estbi ke nêweş bi û tedawîya qansêrî dîyêne. Ewro aşkere bi ke, Munzur Çem şaristanê Almanya Berlîn de şîyo heqîya xo ser.

Wefatê Muzur Çemî mîyanê sîyasetê Kurdan û roşnvîr û nuştoxanê Kurdan de bi sebebê xemgînîyêka pîle.

Endamê Grûba Xebate ya Vateyî Nuştox Seyîtxan Kurijî derheqê wefatê Munzur Çemî de Amîda Xebere rê qisê kerd û derheqê ey de malumatî dayî.

Seyîtxan Kurijî wîna qalê Munzur Çemî keno; “ Munzur Çem semedê ziwanê ma û miletê ma ercêko muhîm bi. Ma zî pê hesyayê ke ewro serê sibayî Almanya de şîyo heqîya xo ser. Seke zanîyeno Grûba Xebate ya Vateyî serra 1966î de Swêd de ameya ronayîş. Munzur Çem zî ronayoxanê Grûba Xebate ya Vateyî ra yew o. Hetanî ke bi nêweş (2015) mîyanê Grûbe de serekîya kombîyayîşan kerd. Munzur Çem hetanî roja ke şi rehmet semedê miletê xo û semedê ziwanê ma xebatê pîlî kerdî. Hem welatperwer bi hem zî xebatkar bi. Oyo ke xebata Grûba Vateyî motîve kerdêne û rayberdêne înan ra yew bi. Waştêne kultur û ziwanê Kurdan nêmirê. Waştêne wa Kurdî zî sey her miletî bi heqanê xo biciwîyê. Her tim waştêne bido ispatkerdiş ke Zazayî û Elewîyî zî Kurd ê. No war de xebatê ey ê akademînî estbî. Nasnameyê Dêrsimî ser o zaf xebatî kerdî û dayî çapkerdiş. Ma pê wefatê ey zaf xemgîn ê.”

Endamê Grûba Xebate ya Vateyî Nuştox M. Selim Uzunî zî Amîda Xebere rê derheqê wefatê ey qisê kerd û xemgînîya xo îfade kerd.

M. Selim Uzunî da zanayîş ke Munzur Çem do dewa Gêxî Qurze de bêro heqkerdene û derheqê ey de wîna vano; “Munzur Çemî de qanserê roqeleyan estbi. Goreyê wasîyetê ey meyîtê ey do qezaya çewlîgî Gêxî de bêra heqkerdene. Munzur Çem temsîlê yew neslî kerdêne. Temsîlê şexsîyetê Dêrsimî kerdêne. Yewbîyayî û hewlîya Kurdan waştêne. Demêko derg mîyanê sîyasetî de zî mend. Xora serra 1980 de demê derbeyê 12ê êlule de de surgun bi û şi Ewropa. xeylêk Swêd de mend. Serra 1996î ra nat Gruba Xebate ya Vateyî de xebate kerde. A serre ra nata serekê Kombîyayîşanê grûbe ma bi. Wexto ke ey de nêweşî dest pêkerd wazîfetê ey min bi xo girewt xo ser. Emegê ey ziwanê ma Grûba Vateyî rê zaf bî. Merdimêko zaf pozîtîf bi. Derdê ey Azadîya miletê xo û serbestîya ziwanê Kurdî. Derdê ey sey derdê Nurî Dêrsimî û Alîşerî bi, ziwanê ma Kirdkî (Zazakî) bi.”

Munzur Çem Kam o

Munzur Çem, 1947 de dewa Gêxî Qurze de ame dinya. Mektebo virên dewa Gêxî Seter de, mektebê mîyanên kî qezaya Dêrsimî Qisle de wend. Serra 1962 de Erzirom de dest bi wendişê Kolejê Tenduristîye (bi tirkî: Sağlık Koleji) kerd, 1966 de Dîyarbekîr de qedêna. Amnanê 1966î de sey memurê tenduristîye (bi tirkî: sağlık memuru) dest bi kar kerd. Hetê ra gureya hetê ra zî wend. Bi no qayde, mektebê Îqtîsadî û Ticarî yê Berzî yê Anqara 1971 de qedêna.

1975 de îmtîhan qezenc kerd û Anqara de, Sayiştay de sey kontrolorî dest bi karê xo yê neweyî kerd. 1980 de, çend aşmî/mengî cuntaya 12ê êlule ra ravêr, welat terk kerd, şî welatanê teberî. Sebebê nê terkerdişî kar û xebatê eyê polîtîk û karê nuştoxîye bî. A roje ra nat welatanê peşeyan de ciwîyeno.

Munzur Çem 1970 ra bi nat meqala, hîkaye, roman û temayanê bînan de kitaban nuşneno; şanik û lawikê ke mîyanê şarî der ê, înan dano arê. Temaya meqalayanê ey ekonomî, polîtîka û kultur o. Îmla û rastnustişê kirmanckî ser o kî xeylî gureyeno.

Cuntaya 12ê êlula 1980 ra avê, grûba polîtîk a ke bi nameyê “Özgürlük Grubu” (Riya Azadî/Rayîrê Azadîye) amêne namekerdene, aye de xebitîya. Meqalayê xo yê perîyodîkî kî sifte kovar û rojnameyanê na grûbe de nuştî. Ma vajîme, kovarê sey Özgürlük Yolu, Roja Welat, Özgürlük ûêb.

Tawo ke nuştoxî welat terk kerd, peynîya serra 1980 de şî Almanya. Ey hetê ra karê xo yê polîtîkî ramit, hetê ra kî sey rojnamevanî gureya.

Adara 1984 de Almanya terk kerde û şî Swêd, uca îltîca kerd. Payîzê peyênê 1996î ra bi nat paytextê Almanya Berlîn de ciwîyêne.

Munzur Çem xebatkarêde heqanê merdîman (mordeman) o Zaf cayan de rewşa (halê) heqanê merdîman ser o xeylê xebetîyayo. Û Munzur Çem, sazkerdoxanê Kurd-PENî ra yew o (ju yo). Ey bi grûbê embazanê xo serra 2001 de, paytextê Almanya Berlîn de bi nameyê Înstîtutê Ziwan û Kulturê Kirmancî (Zaza)-Berlîn, dezgehê saz kerd.