Şaredarîya Dîyarbekirî de ‘promosyon’ bedilîya

AMİDA XEBERE- Semedê 541 karker û karmendan ê ke Şaredarîya Bajarî Girdî ya Dîyarbekirî û DİSKİ de xebityayêne verê cû Bankaya Yapi Kredi reyde 28 hezar lîreyîn pêameyîşê soznameyê promosyonî virazîyabi.

Karkerî verê cû maaşê xo Halkbank ra girewtêne. La Halkbank taleb kerd ke soznameyo ke semedê 4 hezar û 500 lîre ameyo kerdene wa betal bibo. Naye ser o pêvînayîşî newe ra dest pêkerdî. Pêvînayîşê ke Şaredarîya Dîyarbekirî kerdbî peynî bîyî. Soznameyê promosyonî o ke Bankaya Yapı Kredi reyde semedê 28 hezar lîre amebi kerdene ame îptal kerdene. Herinda ci de Halkbank reyde semedê 24 hezar lîre sozname ame îmza kerdene.

‘Ma semedê feydeyê karkeran îmza kerd’

Serekê Şubeyê No 1 yê DİSK Genel İşî Kamuran Taşî Amîda Xebere rê qisey kerd û derheqê nê bedilnayîşî de nê çîyî vatî, “Semedo ke soznameyo newe feydê ci karkeran rê estbi ma qebûl kerd. Eke ma pêameyîşê Yapı Kredi yo 28 hezar lîreyîn qebûl bikerdêne, her karker do 4 hezar 500 lîre bidayêne Halkban û zirar bikerdêne. Goreyê soznameyo ke Halkbank reyde bîyo, karker û karmendî do 24 hezar lîre promosyon bigîrê. Pêvînayîşî hetê Şaredarîya Dîyarbekirî ra ameyê kerdene. Ma sey çimdar beşdarê pêvînayîşan bîyê. Semedo ke feydeyê nê soznameyî karkeran rê esto ma qebûl kerd û îmza eşt ci”

Heto bîn ra Şaredarîya Baglarî de 230 karker û karmendan rê 21, Yenişehir de 170 xebitkaran rê 22 hezar, Şaredarîya Sûrî de zî pêroyî de 16 hezar 400 lîre do promosyon bêro dayene.