VİDEO-Sîyasetmedarê Çolîgî hînî propagandaya xo bi zazakî kenê

VİDEO-Sîyasetmedarê Çolîgî hînî propagandaya xo bi zazakî kenê

Şaristanê Çolîgî de sîyasetmedarî verê weçînayîşê Serekkomarî û Parlamentoyî hetêk ra xebatanê xo kenê hetêk ra zî hînî bi ziwanê xo propagandaya xo kenê.

AMİDA HABER - Weçînayîşê 14ê Gulane yê Serekkomarîye û Parlamentoyî rê demêko tay mend û namzedê parlamenterîye yê pêro partîyan û namzedê Serekkomarîye xebatan kenê ke şarî ra rayan bigêrê.

Herême de zî şaristanê Çolîgî de sîyasetmedaran dest ci kerdo ke bi zazakî propaganda bikê. Çolîg de kontejanê parlamanterî hîrê yo û namzedê partîyan semedê weçînayîşê Parlamenterîye dest ci kerdê ke bi zazakî qisê bikê û rayanê şarê Çolîgî bigîrê. Şarê Çolîgî zî siyasetê bi zazakî ver keyfweş o û qayîlo wa nika ra tepîya zî sîyasetmedarê Çolîgî bi zazakî siyaset bikê.

Namzeta Partîya Kes a Çep (YSP) Cemîle Turhallı roja ke dest bi xebata weçînayîşî kerda ra nata cayanê ke şina de sîyasetê xo bi zazakî kena û raştê eleqeyêka rinde yena. Turhallı ra dima sîyasetmedaranê bînan zî dest ci kerd ke peyamanê xo bi zazakî bidê

Namzeta YSP Cemîle Turhallı nê qiseykerdişê xo rojanê verênan yê destpêkerdişê propagandaya weçînayîşî de kerd û startê bi zazakî propaganda da. Heto bîna ra Turhallı lîsteya YSP de dora diyîne de ca gêna û Çolîg de tekane namzeda cinî a bi xo ya.

Namzedê AK Partî Fevzî Berdîbek zî bi zazakî yew video ant û semedo ke wa Çolîgijî hetkarî bidê AK Partî û Serekkomar Recep Tayîp Erdoganî hetkarî waşt. Berdîbek lîsteya AK Partî de dora yewine de ca gêno û serra 2018î ra nata parlamanterê AKP yo.

Namzetê CHP Serdar Atalay zî bi zazakî yew video ant û behsê xebatanê xo yê verênan kerd û hetkarîya Çolîgijan waşt. Atalay sey namzedê Îtîfaqê Miletî lîsteya CHP ra dora yewine de ca gêno. Serdar Atalay serra 2009î de AK Partî ra bibi serekê Beledîyeya Çolîgî. Semedo ke serra 2014î de hetê AK Partî ra newe ra sey namzet nêmaebi mojnayîş îstîfa kerdbi. Nika Çolîg de newe ra bi aktif kewto siyaset.

Namzetê ÎYÎ Partî ra zî Hasan Kızılboga zî dest ci kerdo ke peyamanê xo bi zazakî bido. Hasan kızılboga zî lîsteya Partîya ÎYÎ ra dora yewine de ca gêno û vîdyoya xo de behsê cuyayîşê xo keno û hetkarî wazeno.

Enwer Yılmaz

HABERE YORUM KAT
UYARI: Küfür, hakaret, rencide edici cümleler veya imalar, inançlara saldırı içeren, imla kuralları ile yazılmamış,
Türkçe karakter kullanılmayan ve büyük harflerle yazılmış yorumlar onaylanmamaktadır.