AMİDA HABER- Rojnameyo Kurdî yo verên ‘Kurdistan’ 22ê Nîsana 1898 de Qahîre de hetê lajê Mîr Bedirxanî, Miqdat Midhet Bedirxanî ra ameyo vetiş. Seba ney na roje 126 serrî yo mîyanê Kurdan de sey Roja Rojamegerîya Kurdî yena qebûlkerdiş û pîrozkerdiş.

Vetişê rojnameyê Kurdkî ser ra 126 serrî vîyartî. Vejyayîşê nê rojnameyî ra dima serra 1973 de Herêma Fedrela ya Kurdistanî de, roja 22ê Nîsane sey Roja Rojnamegerîya Kurdkî ameya îlankedene û a roje ra nata her serre na roje yena pîrozkerdene.

Roja ke rojnameyê Kurdistanî vejîyayo ra hetanî ewro bi hezaran (çi legal û çi îllegal) kovar û rojnameyê Kurdan vejîyayê. Labelê çi heyf ke her tim nê kovar û rojname, mesul û nuştoxanê înan rê tedayî û neheqî ameya kerdiş.

Hetanî nika xeylê rojnamegerê Kurd her çar parçe de erzîyayê hepisxaneyan û zafê înan zî ameyî kiştene. Hetanî ewro zî rojnamegerê Kurd nêeşkayê wezîfeyê xo bi azadî bîyarê ca. Weşanê înan ameyê qedexekerdiş û azadîya înan ameya astengkerdene. Ayra tarîxê rojnamegerîya Kurdî de trajedîyê pîlî qewimîyayê.

Semedê na roje ewro zaf partîyê Kurdan, dezge û sazîyî beyanatî dayê û Roja Rojnamegerîya Kurdî pîroz kerdê.

No sebeb ra ma rojnamegerê Kurdî zî, na roje, Roja Rojamegerîya Kurdî pîroz kenê û hêvî kenê ke karê Rojnamegerîya Kurdî asan bo, rojnamegerî bieşkê karê xo bi asanî bikerê, bieşkê xo îfade bikê û semedê karê xo yê Kurdî nêrê muhakemekerdiş û surgunkerdiş.