Vayayîya pemeyî se ra se amey war: Citkarî mîyanê tengîye de yê

AMİDA HABER - La emser vayayîya pemeyî 12 lîre bî kêmî, 400 hezar ton peme zî destê citkaran de mend.
Dîyarbekir de emser 800 hezar donime erd ser o peme ame ronayîş la 400 hezar ton peme destê citkaran de mend.

Citkarî mîyanê tengîye de yê

Citkaranê ke par pemeyê xo fîyetêko zêde ra rotbi, emser onca peme na ro la sey par gureyê înan raşt nêşi. Serekê Odaya Bazirganîya Borsa yê Dîyarbekirî Engin Yeşilî Amida Xebere rê qisê kerd û va “Peme par semedê citkaran berhemêko weş bi. Aye ra emser zî citkaran peme ramit. La vayîya pemeyî emser se ra se ame war. Nika sereyê kîloyêk malbîyayîşê pemeyî 16 lîra, kîloyê ey 12 lîra yo. Citkarî 4 lîra mîyanê zirarî de yê”

Çukobirlik do tewr zêde 10 ton bigîro

Engin Yeşîlî da zanayîş ke, aşma ke ma mîyan de yê aşma ke deynê citkaran dîyeno ya û wîna dewam kerd. “Çiqas zî fîyet kêmî bîyo zî citkarî bêçareyê ke malê xo roşê. Xora na aşme deynê bezreyî dermanan û gubreyî û mazotî yeno dayene. Citkaran dest de pere çin yo. Pê deyn gureyê xo kenê. Xora Çokobirlik zî tewr zêde 10 ton gêno. Dîyarbekir de 400 hezar ton peme ameyo berardiş.

‘Ganî destegî do bêrê zêdekerdiş.’

Engin Yeşilî da zanayîş ke vayayîya pemeyî hetê borsaya dinya ra yena bewlîkerdiş, hukmat nêeşkeno midaxeleyê ci bikero, semedê destegdayîşî venga humatî da û wîna va “Çîyo ke hukmat bikero no yo ke ganî desteganê ke verî dayêne bizêdîno. Hukmat 3 serrî yo ke semedê pemeyî sereyê kîloyêk hezar û se lîre desteg dayêne. Enflasyon berz bîyo la no desteg nêzêdîyayo. Ganî semedê sereyê kîloyêk 3 hezar lîra desteg bêro dayîş..” (İlyas Akengin)