Hetê zîwanê maya/ dayêke ra torêyê/mezgê mîn de vateyê bapîra mîn estê. No çî ra anû yo? Bî raştî ez jî nêzanena. Wexto banderbîyayîşê zîwanê dayîke, no wext jî mîyanê yew û panç serrîya de yeno ca.

Cûyayîşê rojane de beno kî têkîlîya mî bî bapîra mîn ra zaf ameyo vîrajtîş qey acuyo. Yeno zanêtîya û vîrîya mîn jî, ez maya xo dîrê nêy, bapîra xo dîrê kewtêne ra. Mî maya/dayê xo ra vatêmê ''cîcê'', (nîka jî dor dor ra qey mayo xo no vate jî yeno vatîş) bapîra xo ra vatêne ''dayê''. Pîra mî werdîş dayêne mî, berava mî ayê kerdîne, mî dîrê kayanekî aye kay kerdîne, estanêkê mî rê aye vatêne, mî rê deyêrî aye lornêne.

Wextê tutîtîyê de cûyayo rojane kamî dîrê ameyo vîraştîş, cûyayê tûtan jî benê sey înan; demê vîyerte de nê kesî jî ya bapîr bîyêne, ya jî dapîr bîyêne.

A ya mî papîrê bî. Bapîra mî tûtîtîya mî de her çî yê mî bî. Wexto ez bîya pîle,bapîra mî bîye kokîmê, no fîkrî mî vûrîya, maya xo newe ra şînasna. Nîka ez hêdî hêde bena kokîmî, vateyê bapîra mîn mezge mî de benê cûyaye. Homa rehma xo pîra mî ko, bapîra mî, mî bî bexîşno!

Wexto kê tûtîya mî yeno vîra mî, zaf vateyê bapîra mî yenê vîrîya mî. Nê vateyan ra yew vatêyê ka bapîra mi, mezgê mî de ca gûrewtîbî û nêşîbî vîrîya mî ra na bî; ''Mergê morcelî yeno, peranê sûran vejneno''. Beno ku, seba na vateyî ra, tûtîtîya mîn ra, hetanê înka jî cûyayê morcelan zaf bala antîne.

Bî raştî menaya na vateye dî hetê newîtîyede menayêko negatîfî esto. La aya mî menayê na vateya verînan nîyo. Na vate de cêkûya '' morcelan'' bala mî de bî, dî tûtîtîya mî ra bala mî antîbî û nîka jî anceno.

Qey mî çî ko balkêş bî, no bal antîşî. Çîmkî '' Morcelayî'' dî cûyayîşê mînde zaf çî yê ko mûhîm gûrewtîbî. Na mûhîmmatî çî bî? Bellê na mûhîmatî: Bî hetê morcelan ra cûyayîşê ko bî komalî ameyne sazkerdîş. Sazkerdîşê ko bêqûsûr. Gelo merdîmatîyede sazkerdîşê ko bêqûsûr mîmkîn no ya nêy?

Yeno zanayîş kê, tewîr bî tewîr ''Morcelayî'' estbî û estê. Êykê bala mîn antîbî, ''Morcelayê'' ku derû dora cûwenan de morcelîstan sazkerdêne, têkîlaya mî, bala mî de înê morcelayî bî.

Cûyayîşê nê morcelayan bî raştî sazîyê ka serekê bî; ez bî xebatî û xebatkarîya nê morcelayan ra zaf şaş mendînê. Çîyê ko merdîmê şaş verdeno bîngehîyanê mîraqan vîraznenê. No mîraq sey vîraştîşê morcelîstan û xebatê înan xo nîmtîkî û hêdîkî cayê ko xo sere vîrazneno.

Mî dewe de tîmî verê cîwînan de, cayo xele, genîm, nîskî estbîye morcelayî dîyêne û nê cayande morcelîstan vîraznaynêne.

La bî raştî cûya û xebatê morcelayan bî mî çîyê ko ser aqîl ra bî. Aqilê merdîmî cûyayê û xebatê morcelayan sero bîyêne betal, nê şûxûlyêne.

Mezgê mî de, hete ke ra vateya bapîra mî; ''Mergê morcelî yeno, peranê sûran vejneno''. Heto bîn ra xebat û sazkerdîşê morcelîstanê yê ko bî nê ganîyanê qîjkekan amenê vîraştene. Nay ser nê aqil nê jî zanîstîya înkayê civabanê na hedîseye danê.

Sey yeno zanayîş şarîstananê pîlan de mînakê morcelayan ra verdê, bînê şarîstanan kerdo sey morcelîstanî; gelo qey mergê merdîmatî ameyo sey morcelan bînê şarîstananê xo kerdîne qûlî û şîkeftî.

Merdîmatî vere verênan de serê erdî ra qûlî û şîkeftî vîraştîbî. Nê qûlan û şîkeftan de cûyêne. Nîka reyna qûlî û şîkeftî yenê vîraştane; perranê sûran xo rê kenê, şînê cûyayê xoyo kevnarî.

Xebatkarîya morceleyan ma rê bîya, mînakayanê cûyayê ma yo verênan. Mergê morcelan bî perranê sûran yeno, ma bî hacetanê teknolojîkan dînyaya xo heremnenê; cûyayê merdîmatî û gîyananê bînan qey keyfê xo xerapnenê û heremnenê. Vateyê ka bapîra mî, ez morcelan ra berda sînorê ko bîn, xora bandora vateyanê verênan înakîya; gera mezg û vateya merdîmî bîkero xwerê ko bê bînî.

Mezgê merdîmatî xora bêbîngehêka çale ka xwerîya. Na çale ra vateyê verênan,vateya bapîra mî ra, hetanî morcelayê per sûran ra xo dano pê û yenê eyro alozeyanê newenan mezgê merdîmî de vîraznenê.